Bankamannatekjur 2008 og 2009 30. júlí 2010
Posted by Agnar Kristján Þorsteinsson in Atvinnumál, Fjármál.trackback
Einar Karl Friðriksson rifjar upp í pistli á bloggsíðunni sinni mótmæli og vandlætingu SUS á birtingu tekna. Þar má sjá vitnað til fréttar um tekjur bankamanna frá árinu 2009 og er áhugavert að bera saman tölfræðina þar og tölfræðina vegna álagningar fyrir 2009.
Þar sem upplýsingar eru ekkert nákvæmar þá nota ég meðaltal fyrir tekjubilið fyrir tölurnar og er þetta því gróft. Ekki reikna ég heldur inn í tryggingagjald, lífeyrissjóð eða annan kostnað sem bætist ofan á þessi laun fyrir fyrirtækin.
Árið 2008 eru 273 aðilar í fjármálageiranum með yfir milljón í laun á mánuði. Þeir skiptast svona:
- Bankamenn með 1-3 milljónir í laun eru 200. Hreinn launakostnaður af þeim er því 4,8 milljarðar yfir árið.
- Bankamenn með 3-10 milljónir í laun eru 73, þrir nefndir hér fyrir neðan sérstaklega svo hinir 70 kostuðu hið minnsta 2,52 milljarða.
- Hreiðar Már er með 35,8 milljónir í laun. Hann einn kostar því um 430 millur yfir 2008 auk alls annars. Tveimur árum áður borgaði hann um 400 milljónir í skatta svo laun hans hafa lækkað frá 2006 um 600 milljónir sé miðað við útreikninga hjá Einari Karli.
- Sigurjón Árnason er með 22,9 milljónir á mánuði. Hann kostar því fyrirtækið um 274,8 miljónir á ári.
- Elín Sigfúsdóttir er þriðji aðilinn sem er nefnd í hærri kantinum. Launakostnaður er því 144 milljónir fyrir utan gjöld líkt og í tilfellum annarra.
Lítum því næst á það sem kom fram með árið 2009 eftir Hrun. Þar er enn sem komið er frekar grófar upplýsingar þó maður reyni að gera sitt besta og tek ég einnig dæmi um laun einstakra manna.
- Bankamenn með 2 milljónir eða meir(ekki tekið fram bil) eru 200. Þeir kosta því fyrirtækin 4,8 miljarða á ári í laun hið minnsta. Reikna má með samt að þetta sé ívíð hærri tala.
- Lárus Welding er með 10,8 milljónir i tekjur á mánuði, væntanlega vegna starfslokasamnings. Það gera 129,6 miljónir í kostnað fyrir viðkomandi þrotabú.
- Geirmundur Kristinsson, sparisjóðsstjóri í Keflavík en sá sjóður fór yfirum í fyrra, er með 20,4 milljónir á mánuði. Það gera 244,8 milljóna kostnað fyrir sparisjóðinn.
- Óttar Pálsson, forstjóri Straums er með 11,3 milljónir í laun á mánuði. Það gera um 135,6 milljón króna kostnað.
- William Fall, fyrrum forstjóri Straums er með 8,6 miljónir sem er væntanlega vegna starfsloka. Hann kostar því 103,2 milljónir.
Ef við hugleiðum þetta aðeins þá vegna þess að fréttin frá 2009 er ítarlegri unnin, er erfiðara að sjá með 73 manna tekjuhærri hópinn sem virðist þó hafa verið talsverðir hálaunamenn miðað við hina þrjá. Hreiðar Már og Sigurjón eru reyndar svo “láglaunamenn” í dag, teljandi fram í kringum 300 þúsund króna tekjur. Eiginlega kannski eina breytingin sem má sjá út úr þessu er að það hefur fækkað um 73 ofurlaunamenn en þó gæti vegna ónákvæmni í frétt, verið sami kostnaður fyrir fyrirtækin í raun.
Maður veltir því ósjálfrátt fyrir sér hvort launin hafi lækkað í raun þó þessi geiri sem skilar ekki neinum framleiðsluverðmætum heldur er þjónustugeiri, hafi ollið hér efnahagskreppu. Allavega grunar manni að þeir sem hæst hafa launin þarna haldi sínu en eins og venjulega þá er lækkað við fólkið á gólfinu og í stað þess að lækka kostnaðinn af þessum rándýru starfsmönnum þá er gripið til þess að skerða þjónustu sem kostar smáaura en veldur aukinni óánægju fórnarlamba Hrunsins.
Eins og t.d. að loka útibúinu á Stöðvarfirði.
Ummæli
Sorry comments are closed for this entry