|
|
Mér er alveg nákvæmlega sama hvað Vikan segir. Það er ekkert fínt að fara í lýtaaðgerðir, a.m.k. ekki til að öðlast eilífa æsku. Ég er komin með nóg af þessum bótoxbeljunum sem mæta mér í hverjum einasta sjónvarpsþætti. Þær eru svo strekktar að þær eru með króníska brosvipru og skásett augu. Strekktur munnur og augu minnka stórlega tilfinningasviðið sem leikkonur á “besta aldri” geta tjáð, nema það sé einhver leið að láta í ljós sorg með nefinu sem mér er ekki kunnugt um. Þess utan hætta kvikmyndir og sjónvarpsefni að vera afþreying þegar maður óttast í sífellu um að eitthvað gefi sig við hársvörð leikkvennanna með þeim afleiðingum að augu, eyru, munnur og nef skreppi saman í litla rúsínu við miðbik höfuðsins. Þess vegna er mikill léttir að horfa t.d. á Angelicu Huston í Medium með þúsund hrukkur eins og konur sem eru á nálgast sextugt eiga að líta út.
Nei, það er fínt að fara EKKI í lýtaaðgerðir.
… a.m.k. samkvæmt undarlegum lagatúlkunum Moggans. Alveg merkilegt til hvaða ráða örvæntingarfullir ritstjórar grípa í þeim tilgangi að auka lestur á deyjandi miðli.
Nú er víst bannað að hlekkja á einstaka fréttir á mbl.is. Aðeins má vísa á forsíðuna ef heimilda er getið. Það þýðir að flestir bloggarar og Facebook-notendur hafa nú brotið gegn einkalögum Moggans. Nú má vefritið sem ég stýri, Hugsandi.is, e.t.v. búast við lögsókn því þar er venjan að tengja á vefefni sem vísað er til í heimildaskrá.
Þetta þýðir þá bara eitt. Algert stræk á allt efni Moggans. Mbl.is kveð ég með eftirfarandi orðum:
SUE ME! Og látið ykkur ekki detta það í hug að ég sé að vísa á eitthvað bitastætt að ykkar vefsnepli. Hann mun ég aldrei nota aftur. Og ég mun færa hverja einustu tilvísun í Morgunblaðið inn í doktorsritgerðina mína með óbragð í munni.
Mikið helvíti er umræðan á Hugsandi skemmtileg þessa stundina. Það er greinilegt að það eru þörf á að ræða þessi mál. Það er annars mjög fróðleg kynjaskiptingin í umræðunum og greinilegt að fáar konur vilja gefa álit sitt í Grapevine en margar konur hafa áhuga á að ræða af hverju það eru svona fáar konur í Grapevine. Kannski að rangar konur hafi verið spurðar til að byrja með.
En talandi um kynjahlutföll og kynjajafnrétti þá er hér áhugavert viðtal við Auði Styrkársdóttur á Rás 1 á laugardaginn. Þar er að finna ákveðnar hliðstæður við umræðuna á Hugsandi.
Hérna eru umræðurnar á Hugsandi: http://hugsandi.is/articles/brosad-i-gegnum-tarin-ungfru-grapevine-2009/
Hérna er viðtalið: http://www.ruv.is/heim/ahugavert/nanar/store218/item323669/
Eins og þið vitið er ég mikil áhugamanneskja um konur. Því kemur varla á óvart að um leið og fuglavinir leggjast í garðfuglatalningu þá hef ég mína árlega kvennatalningu. Lítið var að hafa upp úr krafsinu þetta árið. Niðurstöður könnunarinnar má finna á öndvegisvefritinu Hugsandi á slóðinni: http://hugsandi.is/articles/brosad-i-gegnum-tarin-ungfru-grapevine-2009/. Útdráttur birtist hér að neðan.
Kvenmannsleysi virðist ætla að hrjá fjölmiðla landsins sem aldrei fyrr árið 2010. Grunsamlega mörgum fréttakonum er sagt upp hjá RÚV og reynsluboltinn Elín Hirst fær að fjúka á meðan karlkyns hliðstæður virðast eiga auðveldara með að halda vinnunni. Karlar eru ríkjandi á miðlum eins og Kistunni og Pressunni ásamt því sem Sverrir Stormsker fær reglulega að ausa kvenhatri yfir lesendur Moggans. Það kom því væntanlega engum á óvart að þegar Grapevine gerði árið 2009 upp í sérblaði í janúar 2010 að karlar yrðu í meirihluta þeirra álitsgjafa sem leitað var til. Það hefðu þó væntanlega færri tekið eftir kynjaskekkjunni hefðu aðstandendur blaðsins algerlega sleppt því að spyrja konur í stað krýna Írisi Erlingsdóttur „Ungfrú Grapevine 2010“, eina kvenkyns álitsgjafa blaðsins.
Í sérblaðinu eru búsáhaldabylting, stjórnarslit og tilheyrandi havarí rifjað upp auk þess sem að nokkrir einstaklingar úr lista- og menningargeiranum birta topplista yfir hin og þessi atvik sem vert þykir að minnast. Álitsgjafarnir eru mjög breiður hópur: Andri Snær Magnason, Paul Nikolov, Ingi F. Vilhjálmsson, Egill Helgason, Valur Gunnarsson, Marc Vincenz, Örvar Þóreyjarson Smárason, Þorvaldur Gylfason, Hannes Hólmsteinn Gissurarson í endursögn Hauks Magnússonar, Aftaka, Haukur Már Helgason, Ari Eldjárn, Dr. Gunni, Dóri DNA, Pawel Bartozek, Þórður Snær Júlíusson, Birkir Fjalar Viðarsson og áðurnefnd Íris Erlingsdóttir. S.s. 16 karlar, ein kona og ein hreyfing meta árið 2009 í blaðinu.
Jú, víst!
Annað kvöld grína stelpur á Næsta bar kl. 22 og þið ætlið öll að mæta. Síðast var troðið út úr dyrum svo mætið snemma ef þið viljið vera viss um að komast inn. Ég bið ykkur jafnframt um að taka sérstaklega eftir dagskránni og konu nr. 2 á lista. Og til að hita upp getið þið horft á Kastljósþátt frá síðasta giggi hér og nokkur stelpustandöpp hér að neðan.
Ef þið viljið senda Heru Björk í Eurovision af hverju þá ekki þyrma okkur við forkeppninni og semja beint við Heru og lagahöfund í stað þess að velja 14 afbragðsléleg lög til að “keppa” við hana í beinni útsendingu sem kostar fúlgur fjár? Af hverju ekki að spara og nota peninginn til að ráða aftur eitthvað af fréttafólkinu og fréttaskýrendunum sem þið rákuð fyrir helgi?
Virðingarfyllst
Eurovisionáhugakona í miðbænum
Síðasta miðvikudag var kvikmyndin Maybe I Should Have frumsýnd í Háskólabíói. Ég var í salnum og skrifaði um reynsluna á Kistuna.
Fullkomnunarsinnarnir eiga klárlega að halda sig heima en ég hvet aðra til að drífa sig í bíó þegar hún verður tekin til almennra sýninga í byrjun febrúar. Í myndinni eru nokkur ógleymanleg augnablik líkt og eftirfarandi:
Hún veitir fágæta innsýn inn í samfélag og viðskiptahætti á eyjunni Tortola og eyðir mörgum þeim goðsögnum sem um hana ríkja. Umfjöllunin um íbúana á Guernsey stelur þó senunni. Haft er fyrir víst að Gunnar og Herbert hafi aðeins dvalið á eyjunni í örfáa klukkutíma en þrátt fyrir það tekst þeim að hafa upp á dýrmætum vitnisburði frá fólki sem varð fyrir barðinu á viðskiptaháttum íslenskra útrásarvíkinga. Þau standa í þeim sporum að hafa misst allt sitt sparifé á gamals aldri en skorta tíma og tækifæri til að byggja sjóði sína upp að nýju. Í frásögninni ríkir samúð og skilningur svo íslenskir áhorfendur mega hafa sig alla við að roðna ekki af skömm.
Allir í kreppubíó!
Í dag hélt Sigurður Gylfi Magnússon erindi á vegum Sagnfræðingafélags Íslands þar sem hann kom m.a. inn á hlutverk háskólasamfélagsins til að andæfa tilburðum yfirvalda við að hagnýta sér sagnfræðirannsóknir í áróðursskyni. Ég hefði viljað að hann fjallaði ekki aðeins um ríkisvaldið heldur einnig fyrirtæki. “Fyrirtækjasagnfræði” á eflaust eftir að vaxa fiskur um hrygg um leið og íslensk fyrirtæki uppgötva að fullu hversu gott auglýsingabragð það er að leita aftur til fortíðarinnar og grafa upp sögulegar rætur. Líkt og bandarísk fyrirtæki sem hafa keppst við að finna ímyndaða sem og raunverulega bílskúra sem eiga að hafa hýst fyrirtækin í frumbernsku. Munu íslensk fyrirtæki e.t.v. leita upprunans í hlöðum landsins? Hótel Holt var a.m.k. að halda upp á 80 ára afmæli um helgina og sjálf vann ég sem áróðursmeistari við að skapa Íslandsbanka (nr. 2) 100 ára sögu árið 2004.
Annars voru viðbrögðin við erindi Sigurðar nokkuð áhugaverð. Það verður ekki betur séð en að hinum sagnfræðilegu háskólaborgurum finnist skyldur þeirra við samfélagið nokkuð takmarkaðar. Í það minnsta hafa viðbrögð við fyrri áköllum þess efnis verið dræm en vonandi að SGM hafi tekist að hrista aðeins upp í liðinu, eins og hann er frægur fyrir. Ég hef þó mínar efasemdir, sérstaklega í kjölfar ummæla eins háskólastarfsmannsins sem fannst SGM vera helst til mikið að skipa sér fyrir verkum. Það er greinilegt vindar breytinga blása fjarri vesturenda Vatnsmýrarinnar ef háskólafólk telur sig hafa álíka samfélagsskyldur og starfsmenn á kassa í Bónus.
Hlusta má á erindið hér.
Nágrannakona mín í glerbúrinu í Gimli benti mér á frábæra fróðleiksuppsprettu fyrir kvikmyndaáhugamenn.
Vefritið Film Studies for Free safnar saman ókeypis efni á sviði kvikmyndafræða og birtir á heimasíðu sinni. Þar er að finna hlekki á vandaðar fræðilegar umfjallanir um fjölmörg þemu. Ég þurfti ekki að leita lengi þar til ég fann t.d. vísun á vefritið Journal of the Imaginary and the Fantastic sem tileinkaði nýlega Hayao Miyazaki heilt hefti.
Njótið, kvikmyndanördarnir mínir.
Jæja, þá fékk ég loksins netpóstinn sem ég beið eftir. Nýtt gylliboð barst í innhólfið mitt kl. 9:59 í dag. Alveg magnað hvað þessir svindlarar eru andvígir bilum í næsta nágrenni við kommur, punkta og sviga. Er hér komin viðskiptahugmynd fyrir frú Mercy Jombo? Prófarkalestur fyrir svindlara eins og Kalli lagði til við síðustu svindlarafærslu?
Hello
I represent a group of company based in Iraq and we are currently seeking means of expanding and relocating our business interest in the following sectors : banking, real estate, stock speculation and mining, transportation,health,tourism,communication sector and tobacco thus any sector that is lucrative for investment.
If you think you have a solid background and idea of making good profit in any of the mentioned business sectors or any other business in your country, Please write me for possible business co-operation. More so, we are ready to facilitate and fund any business that is capable of generating 10% annual return on investment(AROI).JV partnership and loan financing can also be considered.PLEASE USE MY PRIVATE MAIL FOR EASY CONTACT(mercy20jomboxx1@webmail.co.za)
Regards,
Mrs Mercy Jombo
Director,Leban Group of Companies,Iraq.
|
|
Recent Comments