Eitt leiðir yfirleitt af öðru, og þegar ég loka augunum og læt hugann reika með röddunum, verður mér hugsað til riddara fyrri tíma, knékrjúpandi fyrir konungi, fáandi blessun og hækkun í tign. Fyrir unnin stríð, háð fyrir hönd konungs og kirkju.

Mér var þá hugsað til íslenska aðalsins, og reyndi að muna hvenær þeir hefðu unnið sína sigra, ekki fyrir konung og kirkju heldur fyrir almenning. Kafla 6 lauk og hugsanir mínar verða skírar.

Bíddu aðeins. Það er enginn aðall á Íslandi. En, það er fólk sem hagar sér eins og þeir eigi rétt á allskonar fyrirgreiðslum, fyrirgefningum sem enginn skilur upphaf útskýringa á, nema þeir sjálfir og þá sennilega samkvæmt einhverjum reglum sem við almenningur vitum ekkert um.

Bara ekkert.

Þetta leiddi síðan huga minn að slagorði Guðlaugs nokkurs Þórs sem hann notaði í kosningarbaráttunni sinni vorið 2009 : Stétt með Stétt.

Spurning :

Er aðall á Íslandi ?

Ef svo er, er orðið tímabært að almenningur fái vitneskju um það, þótt ekki væri nema til þess að vita hvers vegna það á að kyngja því sem þeim er boðið upp á af þessum falda aðal. Aðall sem ekki virðist gera sér grein fyrir því að reglurnar hafa breyst á síðustu tveim öldum og það þarf yfirleitt að fara nokkuð langt til þess að finna jafn veruleikafirrt fólk og vini okkar, íslenska aðalinn.

Lýðræði ríkir í hinum vestræna heimi, lýðræði sem inniber að “allir menn fæðast jafnir fyrir lögum”.

Er ekki orðið tímabært að upplýsa þennan íslenska aðal um það hvernig nútíma samfélög vinna saman í þágu fjöldans, ekki í þágu einstaka útvaldra ?

Getum við gert það á nútíma máta ? Þá á ég við, án þess að nota frönsku aðferðina, frekar notast við nútímalega nýja og sennilega nokkuð góða aðferð :

Leyfum íslensku þjóðinni að skrifa sína eigin stjórnarskrá, með skírum leikreglum, þar sem ekki mun liggja á milli mála hvernig samfélagi við viljum búa í.

Svona nú, komum okkur saman um það, í þágu okkar og komandi kynslóða. Mætum á Austurvöll. Hvenær ?

Þegar þið eruð tilbúin að látið í ykkur heyra.

Nýtt Lýðveldi, Nýtt Ísland !

Ég skora því á alla landsmenn að nota þessa orku sem farið hefur í IceSave deiluna og fá kvótann okkar tilbaka í okkar hendur. Þar eru verðmæti sem ættu að nýtast þjóðinni.

Svona nú, stöndum í lappirnar og endurheimtum kvótann.

Ég óska ykkur öllum Gleðilegra Jóla og þakka fyrir mig. Það er ekki leitt að eiga góða vini og sýndi það sig á afmælinu mínu núna í desember þar sem þið mættuð og spilltuð mér !

Gleðileg jól

Til ykkar sem eruð á móti IceSave

Til ykkar sem telja að við þurfum að gangast við ábyrgð fyrir IceSave

Til ykkar sem viljið AGS burt

Til ykkar sem teljið að AGS sé til góðs

Til ykkar sem viljið Nýtt Ísland, Nýtt Lýðveldi

Þetta ár hefur ekki verið neinu öðru líkt og sjaldan hefur tilbreytnin verið eins stórbrotin. Ég hef hitt alveg frábært fólk sem ætti allt að vera skráð hér, en til þess að þetta verði ekki of langt ætla ég að nefna Heiðu B. og Gunna Sig.

Nú árið er að líða og lítið hefur breyst frá því á jólunum í fyrra. Líkt og þá sofna ég með hugann að vandamálum Íslands og vakna með hugann að sömu vandamálum. Borgarahreyfingin hefur litlu getað breytt, en það er aldrei að vita nema hið nýja ár beri í skauti sér nýja tíma og nýja sýn.

Ísland er, þrátt fyrir hræðilega tíma, eitt af bestu stöðunum í heimi til þess að ala upp börn, þó svo að mín börn hafi valið að snúa til Frakklands þar sem kreppan lætur ekki finna eins mikið fyrir sér.

Þegar maður hefur búið lengi erlendis finnur maður enn frekar fyrir því hve nálægðin skiptir miklu máli. Það er yfirleitt ekki langt að sækja til vina og vandamanna þar sem hægt er að finna fyrir hlýju og ást, og ekki oft sem við finnum fyrir einsemd. Við megum þó ekki líta fram hjá því að með fátækt getur fólk svigið frá vinum og vandamönnum og þurfum við, sem getum, að vera sérstaklega á varðbergi.

Gleymum engum, verum saman og berjumst eins og þær hetjur sem hafa byggt landið okkar í yfir 1000 ár. Sýnum okkur sjálfum og umheiminum að við séum þess verðug að fá hjálp á þessum erfiðu tímum.

Bestu heillaóskir á komandi ári !

Það eru fyrrverandi Ríkisstjórnir sem hafa komið okkur í þessa aðstöðu, með því að vera blind gagnvart spillingunni og svikamillunni sem átti sér stað hérna. Meðlimir fyrrverandi Ríkisstjórna, reyna núna að telja okkur trú um það að skuldirnar sem leggjast á okkur séu núverandi Ríkisstjórn að “kenna”. Hm;

Ætlum við að láta þessa fyrrverandi, vanhæfu stjórnmálamenn komast upp með þetta. Ætlum við að gera þeim leikinn léttann með því að láta þessa menn / konur leiða okkur eins og sauði og segja okkur hvernig við eigum að hugsa, hvaða skoðanir við eigum að hafa, án þess að malda í móinn ?

Þeir sem vilja ekki að við skrifum undir IceSave vilja telja okkur trú um að það hangi saman við ESB aðildarumsóknina. Er það aðalástæða þeirra ? Meina þeir að vegna þessa eigi ekki að skrifa undir ?

Ef við skrifum ekki undir IceSave þá veit ég ekki hverjar afleiðingarnar verða; hvað með eldsneyti fyrir flugvélar, hvað með olíu fyrir skipin og hvað með meðöl ? Hræðsluáróður ? Kannski og kannski er ekkert að óttast, en ég geri það samt.

Ég held að það sé nokkuð víst að ESB muni ekki hætta aðildarviðræðum, aftur á móti er aðildarríkjum frjálst að túlka það, eins og þeim best hentar, ef við skrifum ekki undir og síðan koma þeir fram við okkur samkvæmt því.

En samt, jæja já. Voðalega hafa allir verið vondir við okkur.

Það var ekkert umsátur, hverjum er ekki sama um það hvort bankarnir okkar stækki, svo fremi sem ekki er um glæpastarfsemi að ræða ? Vandamáli okkar Íslendinga er sú, að þeir sem voru á vakt, voru blindir og heyrnarlausir.

Þeir sáu ekki, eða létu sem þeir sæju ekki, hvað var um að vera. Smá dæmisaga :

Jón á peninga í Þýskalandi og vill senda þá til Jómfrúareyja. Ef hann gerir það frá Þýskalandi tilkynnir bankinn hans Trackfin og skattinum frá því. Jón verður settur undir smásjá og allt það sem hann gerir og hefur gert er rannsakað ofan í kjölinn.

Hvað gerir Jón í Þýskalandi ?

Jú, hann sendir peningana til Íslands, landið er jú í EES, og bankinn hefur enga ástæðu til þess að senda út viðvörunartilkynningu til Trackfin og skattayfirvalda. Héðan sendir hann svo peningana sína þangað sem hann vill, og öllum er sama.

Annað dæmi.

Pétur á heima í Rússlandi. Hann vill kaupa sér hús á Spáni. Ef hann sendir peningana beint til Spánar mun bankinn sem tekur við peningunum þurfa tryggingu fyrir því að þessir peningar séu hreinir, þ.e.a.s. að til þeirra hafi verið unnið á heiðarlegan hátt. Pétur getur engan veginn sannað það.

Hvað gerir Pétur í Rússlandi ?

Jú, hann sendir peningana til Íslands, þar sem enginn sér ástæðu til þess að efast um heiðarlega tilkomu peninganna, og sendir peningana til Spánar héðan.

Þessi dæmi eru einungis dæmi og það má vel vera að þetta hafi aldrei gerst.

Hitt er annað mál að eftirlitsstofnanir í Evrópu hafa haft nokkrar áhyggjur af þessu og reyndu að fá íslensk yfirvöld til þess að koma í veg fyrir þetta. En til einskis.

Er einhver hissa á framvindu mála eftir hrunið ?

Annars er ég sammála Styrmi um það að aðildarumsókn okkar að Evrópusambandinu og samningarviðræður þar að lútandi snúast um auðlindir okkar. Sennilega endurheimtum við, sem þjóð, auðlindirnar í okkar úr höndum þeirra sem hafa fengið þær gefins. Ég er líka sammála Styrmi að þetta byrjaði allt með kvótakerfinu og framsali kvótans.

Varanlegar undanþágur; það er ekki víst að við þurfum á þeim að halda ef samningarnir eru góðir hvað varðar auðlindirnar. Það væri nær að tala um “varanlegar undantekningar”.

Ég er svo hjartanlega sammála mörgu af því sem Jón Baldvin segir og virði það að hann taki á sig ábyrgð fyrir lélega stjórnarandstöðu fyrri tíma, sem Styrmir bendir svo réttilega á.

Stjórnlagaþing fólksins núna. Nýtt Ísland – Nýtt Lýðveldi.

Þegar við nálguðumst flugvöllinn blasti við reykurinn frá Bláa lóninu og það leiddi hug minn að orku og þaðan til útrásar”aumingja”.

Hvernig datt einhverjum í hug að verða milljarðamæringur á þessu litla landi, ekki bara einum manni / konu, heldur nokkrum tugum (og kannski voru það nokkur hundruð sem létu sig dreyma um það).

Hvaðan fengu þeir peningana ?

Jú, þeir stálu þeim. Ekki bara frá okkur Íslendingum, heldur fóru þeir í hina margumtöluðu útrás, þóttust vera snillingar, og rændu og rupluðu alls staðar þar sem þeir drupu niður fæti.

Í dag eigum við að borga, við 313.000 sálir, sem treystum Ríkisstjórn og embættismönnum eftirlitsstofnana til þess að vinna vinnuna sína.

Við þurfum að borga vegna þess :

• að við viljum alltaf trúa því besta upp á nágrannann.
• að við viljum ekki trúa því að bræður okkar og systur geti verið óheiðarleg.
• að mágkonur, mágar, svilar og vinir geta ekki verið þjófar !

Kæru landsmenn, vaknið.

Er ekki kominn tími til þess að við förum að sýna óþolinmæði okkar vegna aðgerðarleysis stjórnvalda, eða eigum við að treysta því að þeir séu færir um að sækja til saka bræður sínar og systur, mágkonur og mága, svila og vini ?

Click here to view the embedded video.

Íslenskir ráðherrar virðast ekki skilja hvað þeir hafa mikið vald. Þeir geta, hvenær sem er, tekið fram fyrir hendur dómstóla og hafist handa.

Þeirra skylda er að vernda almenning sem býr á landinu.
Þeirra skylda er að sýna almenningi þá virðingu sem þeir hafa hlotið, með því að taka völdin sem þeir eiga en vita ekki af.

Kæra ríkisstjórn, farið að vinna vinnuna ykkar, hættið að vera hrædd/ir og sýnið almenningi að þið séuð þess verðug að stjórna landinu.

ANNARS VERÐUR ALVÖRU BYLTING.

Þetta segir Ásta Ragnheiður : „Þetta er í samræmi við lýðræðishefðir í nágrannalöndum okkar. Þá er það þannig að þegar þingin láta vinna fyrir sig skýrslur eins og Rannsóknarnefndin er að vinna fyrir Alþingi að þá skilar nefndin þinginu skýrslu og við því tekur þingnefnd. En af því að við erum ekki með neina fasta þingnefnd til þess að þá verður sett á laggirnar sérstök þingnefnd til þess”

Ég spyr : Er þessi Alþingisnefnd ekki þingnefnd ? Hún heitir Rannsóknarnefnd Alþingis….. (§{!!^]})

Hvað er ég ekki að skilja hérna ?

Borgarahreyfingin lýsir furðu sinni og miklum vonbrigðum með þá fyrirætlun forsætisnefndar Alþingis að ætla níu manna pólitískt skipaðri þingnefnd að ákveða einróma hvernig unnið verður úr niðurstöðum rannsóknarnefndar um bankahrunið.

Það kann ekki góðri lukku að stýra að fela alþingismönnum sjálfum það vandasama hlutverk að meta ábyrgð flokksfélaga sinna, t.d. hvort ráðherrar í fyrri ríkisstjórnum hafi með aðgerðum sínum eða andvaraleysi gerst brotlegir við lög. Ólíklegt verður að teljast að samhljóða niðurstaða nefndarinnar skili réttlátri málsmeðferð.

Samkvæmt reglum réttarríkisins er enginn hafinn yfir lög, hvorki ríkisstjórnir, ráðherrar, Alþingi, alþingismenn, stofnanir stjórnsýslunnar né dómararnir sjálfir. 65. grein stjórnarskrár lýðveldisins segir m.a. að allir skuli vera jafnir fyrir lögum. Sú hugmynd að láta alþingismenn sjálfa skera úr um ráðherraábyrgð er engu skárri en að fela Viðskiptaráði að skera úr um ábyrgð fjármálastofnana eða forstjóra þeirra.

Þess vegna verður það að vera hafið yfir allan vafa að allir atburðir sem falla undir refsiverða háttsemi berist frá rannsóknarnefndinni beint til embættis sérstaks saksóknara án tilstuðlan pólitískra milligöngumanna.

Með lögum skal land vort byggja en með ólögum eyða. Vill Borgarahreyfingin beina þeim eindregnu tilmælum til alþingismanna og allra sem rannsókninni tengjast að virða kröfur þjóðarinnar um heiðarleika, réttlæti, virðingu, jafnrétti, ábyrgð og annað sem nýafstaðinn þjóðfundur leiddi í ljós.

Ég fór með 13 ára dóttur minni í Miss Junior France keppni sem hún hafði skráð sig í upp á eigin spýtur, viss um að vera fallegust. Heilinn minn segir nei við fegurðarkeppnum almennt og þá sérstaklega fyrir ung börn og unglinga. Hjartað mitt aftur á móti sá sér ekki fært að segja nei við hana. Ég ýjaði að vísu að því að hún mundi ekki vinna og eins og gefur að skilja þá tók hún því mjög illa. Mér tókst samt að koma því að svona keppni gæti verið smá svindl : maturinn kostaði 65 Evrur og með hverri máltíð fylgdi kjörseðill ! Sem sagt ef ég kom með 10 manns fékk ég 10 kjörseðla.

Hér er Lívey á sviðinu.

Lívey vann ekki (fínt). Það jákvæða við að hafa leyft henni að taka þátt í þessu er að nú vill hún aldrei aftur taka þátt í “svindl” fegurðarsamkeppnum og ætlar að hlusta á mömmu sína næst þegar hún hefur eitthvað að segja.

Enn á meðan hélt lífið áfram sinn vanagang á Íslandi eftir hrun.

• Nýr formaður Heimmssýnar
• Fékk sjö milljarða frá Magnúsi bróður
• Bréfið sem Mogginn birti(r) ekki

Öfgasinnar til hægri og vinstri, dularfull viðskipti og sannleikur sem sumir vilja ekki segja.

Hver vill ekki Nýtt Lýðveldi, Nýtt Ísland ?

Nú rúmu ári eftir hrun sjáum við enn ekki að verið sé að tukta neinn til þó við fáum fréttir af einstaka húsleitum og yfirheyrslum. Það er bara ekki nóg.

Við þurfum að sjá aðgerðir, við þurfum að finna að Ríkisstjórnin og Alþingismenn standi með okkur, fólkinu sem býr hér og borgar skatta, í stað þess að hafa þessa óþægilegu tilfinningu að verið sé að passa upp á ódáðamennina.

Ég er farin að halda að tíminn eigi að vinna fyrir þá, að allt sé gert til þess að glæpir þeirra fyrnist og hægt verði að fela sig bak við þá afsökun þegar loksins verði búið að sanna eitthvað upp á þá. Við getum ekki liðið það.

Ég krefst þess að Ríkisstjórnin fari að vinna fyrir OKKUR, síni okkur hvað þau eru að gera, áður en við gefumst upp.

Ríkisstjórnin á að koma í veg fyrir glæpi þeirra sem taka bíla og hús af þeim sem geta ekki lengur borgað af OKUR lánum. Það er skylda Ríkisstjórnarinnar að vernda íbúa landsins, þeir gætu byrjað á því að endurskoða reglugerðir lánastofnana.

Takk fyrir.