Svanur Gísli Þorkelsson

Félags- og mannréttindanefnd Sameinuðu þjóðanna samþykkti í dag með yfirgnæfandi meirihluta atkvæða eina harðorðustu yfirlýsingu gegn mannréttindabrotum í Íran sem Sameinuðu þjóðirnir hafa látið frá sér fara síðan byltingin var gerð í Íran 1979. Í ályktuninni kemur fram að sjö af forystumönnum bahá’í trúarinnar sem setið hafa í Evin fangelsinu Teheran undanfarna 18 mánuði hafi verið birtar alvarlegar ákærur án þess að þeir hafi getið leitað lögfræðiaðstoðar. Þá lýsir nefndin yfir djúpum áhyggjum vegna stöðugra og alvarlegra mannrétttindabrota í islamska lýðveldinu Íran. Birtur er listi yfir slík brot, þar á meðal yfir harðræði og valdníðslu í kjölfar forsetakosninganna í júní síðastliðnum og aukna mismunun gegn minnihluthópum, þar á meðal bahá’íum.
Bani Dugal, aðalfulltrúi alþjóðlega bahá’í samfélagsins hjá Sameinuðu þjóðunum, segir að þessi ályktun sendi „mjög ákveðin skilaboð til írönsku stjórnarinnar um að alþjóðasamfélagið muni ekki standa hjá og horfa þegjandi á hana fremja brot af þessu tagi.”
     „Allsherjarþingið hefur bent á fjölmörg brot gegn óbreyttum írönskum þegnum, þar á meðal pyndingar, ítrekaða misbeitingu valds, undirokun kvenna og stöðuga mismunun gegn minnihlutahópum, ekki síst bahá’íum sem eru stærsti trúarlegi minnihlutahópur landsins og sætir ofsóknum eingöngu vegna trúar sinnar,” segir Bani Dugal.
     Í ályktun mannréttindanefndarinnar er sérstaklega fjallað um árásir á bahá’ía í írönskum ríkisfjölmiðlum og stóraukið eftirlit lögreglu og leyniþjónustu með bahá’íum. Þetta eftirlit felur m.a. í sér heimildir til að handtaka bahá’ía hvenær sem er og hindra þá í að sækja háskóla og vinna fyrir brauði sínu.
     Kanada lagði fram ályktunina ásamt 42 öðrum löndum, þar á meðal Íslandi. Þar er íranska stjórnin hvött til þess að leyfa etirlitsaðilum Sameinuðu þjóðanna að heimsækja til Íran og jafnframt er framkvæmdastjóri SÞ beðinn um að leggja fram skýrslu um ástand mála í Íran og aðgerðir íranskra stjórnvalda til að uppfylla skyldur sínar í mannréttindamálum.